Rundunar ‘Yansandan Jihar Bayelsa ta fara bincike kan bacewar wani dan NYSC mai shekara 24, Mista Lebi Anyanwu, mai lambar rajista BYS/25A/0244, wanda aka bayyana a matsayin wanda ya bace a jihar.
PUNCH Metro ta samu tabbaci daga wata sanarwa a ranar Litinin cewa jami’an Sashen Yaki da Garkuwa da Mutane na rundunar sun kaddamar da bincike domin gano hakikanin abin da ya faru.
- Kasar Sin Ta Musanta Zargin Da Wakilin Amurka Ya Yi Game Da Batun Sauyin Yanayi
- Mataimakin Firaministan Kasar Sin Ya Halarci Taron COP30 A Brazil
An ruwaito cewa Anyanwu, wanda ake aikinsa na farko a Ijaw National Academy, Kaiama, hedikwatar Karamar Hukumar Kolokuma/Opokuma ta jihar, ya bace tun ranar 8 ga Oktoba, 2025.
A cikin wata sanarwa da jami’in hulda da jama’a na rundunar, Mista Musa Mohammed, ya fitar, rundunar ta umurci Sashen Yaki da Garkuwa da Mutane da su dauki matakai na gaggawa don gano da mayar da dan NYSC din.
Sanarwar ta bayyana cewa an yi zaton yana tare ne da wasu mambobin cocin Jehobah’s Witnesses, Mista da Matarshi Wisdom George, amma su suka ce da fari yana tare da su, sai dai ya tafi daga bisani.
A cewar ‘yansanda, “A ranar 10/10/25, an gayyato wani Mista Oke Emmanuel, dan NYSC kuma abokin dakin wanda ya bace, domin yi masa tambayoyi. Ya tabbatar cewa wanda ake nema ya kasance tare da iyalan George har zuwa 06/10/25.
“An samu karin bayani daga George cewa dan NYSC din ya koka da rashin lafiya, aka kai su Asibitin Kaiama Referral Hospital a ranar 04/10/25, kuma aka sallame shi ranar 05/10/25. Sai dai a ranar 06/10/25, dan NYSC din ya bace zuwa wani wurin da ba a sani ba.”
‘Yansanda kuma suna binciken zargin karbar kudin rashawa na Naira 100,000 daga iyayen wanda ya bace, da wasu fursunoni biyu da ke gidan gyaran hali na Igbara, Abeokuta, Jihar Ogun, wadanda suka yi suna kamar masu garkuwa da mutane.
“An bar wayar salula ta wanda ya bace a dakinsa. Jami’an bincike suka bi layin kira daga lambar 0906193291, inda aka gano tana hannun wani fursuna da ake tsare da shi a cibiyar gyaran hali ta Igbara, Abeokuta, saboda wani laifin garkuwa da mutane.
“Wanda ake zargin ya ce sun ga lambar wayar a kafafen sada zumunta, suka yi amfani da ita don cutar da mahaifin wanda ya bace, Mista Anyanwu Simon, mai shekara 56. An biya kudin Naira 100,000 zuwa asusun Opay mai lamba 7042793493 na wata Atinuke Oluwalose, abokiyar hadin bakin fursunan da ke gidan yarin Abeokuta.”
“Daga bayanan da jami’an bincike suka gano, akwai wasu abubuwan damuwa da ka iya kasancewa silar abin da ya faru. An gano wasu kalaman da wanda ya bace ya yi dangane da wasu sabbin dabi’u da sha’awowi da ba su dace da akidar addininsa ba,” in ji sanarwar.
Sanarwar ta kammala da cewa ana ci gaba da daukar matakan bincike “domin tabbatar da sakamakon da jami’an bincike suka tattara, kasancewar binciken ya fito da abubuwa masu ban mamaki. Ba a samu wata alamar garkuwa da mutane a wannan lamari ba. Ana ci gaba da aiki domin samun cikakken bincike.”
PUNCH Metro ta ruwaito a watan Oktoba 2024 cewa an kama mutum hudu kan bacewar wani dan NYSC mai suna Yahya Faruk, wanda yake hidima a Ikuru, cikin Karamar Hukumar Andoni ta jihar.
