Xi Jinping Ya Ba Da Umurni Game Da Babban Shirin Shekaru Biyar-Biyar Na Bunkasa Tattalin Arziki Da Zamantakewar Kasar Sin Na 15

Shugaban kasar Sin Xi Jinping, ya ba da umurni kan babban shirin shekaru biyar-biyar na bunkasa tattalin arziki da zamantakewar kasar Sin karo na 15, inda ya nanata wajibcin tsai da shiri bisa halin da ake ciki, matakin da ya kasance muhimmiyar dabarar jam’iyyar kwaminis ta Sin wato JKS a fannin gudanar da harkokin kasa, kuma fifiko a siyasance na tsarin mulkin gurguzu mai salon musamman na Sin.

Xi ya ce tsai da babban shiri na 15 na da babbar ma’ana ga tabbatar da manyan tsare-tsare da aka tanada a yayin babban taro karo na 20 na JKS, da gaggauta zamanantar da al’ummar Sinawa. Don haka dole ne a samar da shiri bisa halin da ake ciki, bisa tushen demokuradiyya da doka da shari’a, ta yadda al’ummun kasa za su iya cin gajiyar manyan tsare-tsare.

Ban da wannan kuma, an saurari ra’ayin jama’a daga dukkan fannoni, da koyi da dabarun da aka samu a ayyukan yau da kullum, don dunkule ayyukan da za a yi da manufofin da za a dauka, ta yadda za a cimma nasarar aiwatar da shiri mai inganci.

Sin za ta gudanar da shiri na shekaru biyar-biyar na 15 a badi, yanzu kwamitin kolin JKS na rubuta shawarar tsai da shirin. (Amina Xu)