‘Yan Bindiga Sun Kashe Dan Sanda Tare Da Raunata Wasu A Legas

Wasu gungun ‘yan bindiga sun kashe dan sanda guda daya tare da raunata wasu uku a yankin Ikorodu da ke Jihar Legas.

Wakilinmu ya tattaro a ranar Litinin cewa maharan sun ci karo da jami’an ‘yan sandan da ke sintiri inda suka yi ta musayar wuta a ranar Juma’ar makon jiya.

• Gwamnatin Bauchi Ta Ja Kunnen Masu Wa’azi Kan Amfani Da Kalaman Tunzura Jama’a
• Rashin Tsaro: Buhari Ya Gyara Nijeriya Fiye Da Yadda Ya Same Ta, In Ji Adesina

An kuma tattaro cewa maharan sun tsere da bindigar dan sandan da suka kashe.

Duk da cewa rundunar ‘yan sanda ba ta tabbatar da faruwar lamarin a hukumance ba har ya zuwa lokacin hada wannan rahoton, amma an tattaro cewa jami’an rundunar ‘yan sandan yankun Imota da ke yankin Ikorodu suna aikin sintiri ne a lokacin da aka kai musu hari a mahadar Emuren, kan titin Itokin.

Shaidu sun tabbatar wa manema labarai cewa ‘yan bindigar sun kai wa tawagar ‘yan sandan sintiri tare da bude musu wuta.

“’Yan sandan sun yi sintiri ne a lokacin da suka ci karo da ‘yan bindigar, inda suka bude musu wuta, inda suka kashe daya nan take, suka raunata wasu uku sannan suka tsere da bindigarsa,” in ji wata majiya.