Wasu ‘yan bindiga sun kashe akalla mutane uku tare da kone gidaje 22 a wasu kauyuka biyu na karamar hukumar Billiri a Jihar Gombe da sanyin safiyar ranar Alhamis.
Kwamishinan tsaron cikin gida na jihar, Adamu Kubto Dishi ne, ya bayyana hakan a ranar Juma’a yayin da yake zantawa da manema labarai a gidan gwamnati da ke Gombe.
- Hanya Mafi Sauki Ta Magance Matsalolin Sashin Shari’a – Ganduje
- Gwamnatin Kano Ta Kulla Yarjejeniya Da Makarantar Morocco Kan Harkar Noma
A cewarsa, ‘yan bindigar sun harbe mutane biyu a kauyen Pobawure da wani mutum a kauyen Amtawalam tare da cinnawa gidaje wuta tare da tayar da hankalin mazauna garin.
Ya kara da cewa, a ranar Juma’a da misalin karfe 2 na dare ya samu kiran waya cewa ‘yan bindigar sun far wa kauyukan, ya kuma umarci jami’an tsaro da su garzaya wurin domin dakile harin.
“Idan ba a dauki matakin gaggawa da jami’an tsaro suka dauka ba, girman harin zai yi yawa, jami’an tsaro sun yi nasarar dakile su, ‘yan bindigar sun gudu kuma a halin yanzu ana gudanar da bincike,” in ji shi.
Kwamishinan ya kara da cewa an tattauna lamarin ne a ranar Juma’a a taron majalisar zartarwa ta jihar, inda Gwamna Inuwa Yahaya, ya amince da raba kayan agaji ga wadanda abin ya shafa.
Ya ce tawagar gwamnatin jihar karkashin jagorancin gwamnan ta ziyarci karamar hukumar da safiyar Juma’a domin jajanta musu tare da bayar da kayayyakin tallafin da suka kunshi kayan abinci.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
