'Yan Bindiga Sun Kashe Mutun 3, Sun Sace 30 A Jihar Neja

LABARAI MASU NASABA

Sanusi II Kaɗai Muka Sani A Matsayin Halataccen Sarkin Kano – Kwankwaso

NAF Ta Ragargaza Mafakar Ƴan Ta’adda A Zamfara, Ta Halaka Da Dama

Wasu ‘yan bindiga sun kashe mutane uku tare da yin garkuwa da mutane 30 daga garin Garin Gidigore da ke karamar hukumar Rafi a jihar Neja.

LEADERSHIP ta ruwaito cewa, kauyen Garin Gidigore na da tazarar kilomita kadan daga garin Birnin Gwari a Jihar Kaduna, inda ‘yan bindigar ke da sansanoni da dama a dajin da ke makwabtaka da su.

An gano cewa, harin da ‘yan bindigar suka kai kauyen a daren ranar Litinin ya dauki tsawon sa’o’i da dama, inda kuma aka kona gidaje da dama yayin da suka yi awon gaba da kauyen baki daya.