Wasu da ake zargin ‘yan fashi da makami ne, sun yi wa wani dan kasuwa fashi tare da kashe shi a ofishinsa da ke daura da Ekeki Motor Park a Yenagoa.
Dan kasuwan, wanda aka bayyana sunansa da Cletus, an ce ‘yan fashin sun bisa ofishinsa da sanyin safiyar Litinin inda suka caka masa wuka sau ba adadi har sai da ya mutu.
- Babban Dalilin Sake Neman Ƙarin Naira Tiriliyan 6.2 Kan Kasafin Kuɗin 2024 – Bagudu
- Kada Ku Cire Tsammani Da Gwamnatin Tinubu – Adam Oshiomole Ga ‘Yan Nijeriya
Rahotanni sun ce maharan sun tafi ne da wasu kudade da ba a bayyana adadinsu ba, wayar marigayin da mota kirar Highlander Jeep.
Wakilin kamfanin dillancin labaran Najeriya (NAN), wanda ya ziyarci wajen da lamarin ya faru, ya ga makwabtan marigayin suna cikin jimami.
Ma’aikatansa ne suka gano gawarsa da suka je aiki a ranar Litinin.
Marigayin nai shekaru 40, an ce dan kasuwa ne wanda ke yin kasuwancinsa a birnin.
Kakakin rundunar ‘yansandan Bayelsa, ASP Musa Mohammed, ya ce an fara gudanar da bincike kan lamarin.
