‘Yansanda Sun Gayyaci Shamakin Kano Kan Zargin Karya Dokar Haramta Hawan Sallah

Rundunar ‘yansandan Jihar Kano, ta gayyaci Shamakin Kano, Alhaji Wada Isyaku, domin amsa tambayoyi kan zargin karya dokar da ta haramta Hawan Sallah a jihar.

A cikin wata sanarwa da kakakin rundunar, SP Abdullahi Haruna Kiyawa, ya fitar, ya ce rundunar ta jaddada cewa babu wanda zai karya wannan doka ba tare da hukunci ba.

• Sabbin Motocin Bas 100 Masu Aiki Da Lantarki Sun Fara Jigilar Fasinjoji A Birnin Addis Ababa
• Rundunar PLA Ta Kaddamar Da Atisaye A Yankunan Tsakiya Da Kudancin Zirin Taiwan 

Tun kafin Sallah, ‘yansanda sun sanar da haramta Hawan Sallah a Kano, inda suka ce sun samu bayanan sirri na yiwuwar wasu ɓata-gari za su haddasa rikici yayin hawan.

Haka kuma, kwamishinan ‘yansandan jihar, CP Ibrahim Adamu Bakori, ya kafa wani kwamiti na ‘yansanda takwas domin binciken rikicin da ya faru a ranar Sallah yayin da Sarkin Kano na 16, Muhammadu Sanusi II, ke komawa gida bayan Sallar Idi.

A lokacin wannan hatsaniya, an kashe wani jami’in tsaro tare da jikkata wani daga cikin masu tsaron tawagar sarkin.