Watanni uku bayan zaɓensa a matsayin Shugaban Jam’iyyar APC na ƙasa, har yanzu ana nuna Farfesa Nentawe Yilwatda a matsayin Ministan harkokin jin ƙai da rage talauci a shafin yanar gizon ma’aikatar.
Rahoton jaridar Leadership ya nuna cewa muƙamin da Yilwatda ya riƙe kafin zama shugaban jam’iyyar shi ne Ministan harkokin jin ƙai da rage talauci. Sai dai binciken da aka gudanar a ranar Alhamis ya nuna cewa har yanzu bayanansa suna kan shafin ma’aikatar, inda ake kiran sa da “Hon. Minister, Prof. Nentawe G. Yilwatda.” Shafin har yanzu yana ɗauke da cikakkun bayanai kan aiyukansa a matsayin minista, duk da cewa ya hau kujerar shugabancin APC tun watan Yuli.
- Abubuwan Da Ya Kamata Ku Sani Game Da Sabon Shugaban APC Na Ƙasa, Farfesa Yilwatda
- Farfesa Yilwatda Ya Zama Sabon Shugaban Jam’iyyar APC Na Ƙasa
An zaɓi Yilwatda a matsayin shugaban jam’iyyar APC a ranar 24 ga Yuli, 2025, a taron majalisar zartarwa ta ƙasa (NEC) da aka gudanar a Abuja. An gabatar da sunansa daga Gwamnan Jihar Imo, Hope Uzodimma, kuma kakakin majalisar wakilai, Tajudeen Abbas, ya mara masa baya kafin a rantsar da shi nan take.
Sai dai har yanzu Ma’aikatar harkokin jin ƙai da rage talauci ba ta sabunta shafinta don cire bayanan sa ba. Bugu da ƙari, har yanzu shafin Facebook na ma’aikatar yana amfani da tsohon sunansa — Federal Ministry of Humanitarian Affairs, Disaster Management, and Social Development — duk da sauyin suna da gwamnati ta yi a farkon shekarar.
A halin yanzu, kujerar minista da Yilwatda ya bari tana jiran sabon mai riƙe ta, kuma an ambaci Bernard Mohammed Doro daga Jihar Plateau a matsayin wanda ake ganin zai gaje shi. Duk da haka, babu wata sanarwa da ta fito daga ma’aikatar ko jam’iyyar APC kan wannan kuskuren bayanai a hukumance.
