Rundunar ‘yansandan Jihar Legas ta ce ta kama daya daga cikin jami’anta da ake zargi da yi wa wata yarinya ‘yar shekara 17 fyade a Ogudu.
Kakakin rundunar ‘yansandan, SP Benjamin Hundeyin, wanda ya tabbatar wa Kamfanin Dillancin Labarai na Nijeriya (NAN) a ranar Asabar, ya musanta rahoton da ke cewa hukumar ‘yansanda na kare wanda ake zargi da aikata laifin.
- Ana Zargin Wani Hadimin ‘Yar Majalisa Da Yi Wa Almajiri Fyade A Kaduna
- Saudiya Za Ta Kafa Masana’antun Kera Kayan Aikin Gona A Nijeriya
Hundeyin ya bayyana cewa, jami’in da ake zargin, ya bar wurin aiki tun lokacin da ake zarginsa da aikata laifin, kuma sai a ranar Asabar ya mika kansa don fuskantar tambayoyi.
SP Hundeyin, ya kara tabbatar wa da jama’a cewa, Rundunar ba ta kare jami’inta ba kan zargin da ake yi masa, ya ce kwamishinan ‘yansandan jihar Legas, Mista Adegoke Fayoade, ya umarci sashin kula da jinsi na rundunar da ya gaggauta gudanar da bincike kan lamarin.
“Ana gudanar da cikakken bincike kan lamarin. Babu wani shiri na kawar da wannan zargin,” inji shi.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
