Zelensky Ya Ja Hankalin Duniya Da Abubuwa Hudu Kan Yakin Ukraine

A yayin da sojoji ke can fagen daga suna yaki bayan kutsen da Rasha ta yi wa Ukraine, Shugaban Ukraine din Bolodymyr Zelensky shi kuma na can yana ta ganin yadda za ya yi domin samun taimako daga kasashen duniya.

Daya daga cikin abubuwan da Mista Zelensky ya yi akwai taruka da dama da shugabannin kasashen duniya a Kyib da kuma daukar hoto da fitattun mutane.
A yayin da Ukraine ke fuskantar matsin lamba daga Rasha, Ukraine din na bukatar taimakon kasashen waje domin dakile dakarun Rasha daga ci gaba da shiga ciki.

• Ukraine Na Bukatar Dala Biliyan Biyar Domin Yakar Rasha A Kowanne Wata

Domin samun goyon bayansa, masu kula da bangaren wasa labarai na shugaban kasar sun samo wasu hanyoyi domin jan hankalin duniya kan irin abubuwan da ake fuskanta a kasar.

Taimakon muhimman mutane
Wayar da kan mutanen duniya da fitattu ko kuma sanannun mutane suke yi tun bayan fara wannan yaki, inda suke goyon bayan Ukraine tare da tara kudi masu yawa ya taimaka.

Cikin wadanda ke wannan aikin har da tsohon dan kwallo Dabid Beckham da mawaki Ed Sheeran da ‘yan fim kamar su Sean Penn da Ashton Kutcher da Mila Kunis wadda ‘yar Ukraine ce.

‘Yar fim Angelina Jolie wadda wakiliya ce ta musamman a Hukumar Kula da ‘Yan Gudun Hijira ta Majalisar Dinkin Duniya ta kai ziyara Ukraine a watan Afrilu inda ta hadu da masu aikin sa kai da ‘yan gudun hijira.

Mista Zellensky wanda tsohon dan wasan barkwanci ne ba wai bako bane a wannan harkar dai ya hade da mutanensa da ke goyon bayan kasarsa.

Karbar baki ‘yan siyasa
Irin wadannan hotunan Mista Zelensky yana yin su tare da shugabannin kasashen Turai inda yake neman shawo kan Tarayyar Turan da ta amince da Ukraine ta shiga kungiyar, tare da kuma samun karin makamai.

Cikin shugabannin kasashen da suka kai ziyara Kyib a ‘yan kwanakin nan har da Emmanuel Macron na Faransa da Mario Draghi na Italy da Olaf Scholz na Jamus da Klaus lohannis na Romania.

Haka kuma akwai Firaiministan Birtaniya Boris Johnson da Justin Trudeau na Canada, sai dai babu Joe Biden na Amurka.

Shugaban Amurka Joe Biden ya samar da biliyoyin daloli da kuma makamai ga Ukraine inda ya ce ba ya so ya kara jawo wa Ukraine karin wahala, musamman idan ya ce zai tsaya a kasar a tafiyar da za ya yi nan gaba zuwa Turai.

Kasashen da ba na Yamma ba sun fi samun rabuwa a goyon bayan da suke ba Ukraine a yaki, duk da cewa Mista Zelensky na ta neman taimako, inda ake jan hankalin kasashen Afrika kan abin da zai iya biyowa baya sakamakon yakin Ukraine.

Ya bayyana cewa Yan Afrika sun zama kamar fursunonin yaki kuma suna fuskantar barazanar yunwa saboda yakin ya jawo karancin taki da hatsi – sai dai an gano kasashen Afrika hudu ne kacal cikin 55 suka shiga taron inda aka yi ta intanet.

Sauran tarukan da aka yi na bidiyo an halarce su kuma an yaba wa Mista Zelensky kan bayanansa da ya yi wa Majalisar Tarayyar Amurka da Tarayyar Turai da Jamus da Japan da Faransa da Sifaniya da Majalisun Italiya da sauran su.

Nuna wa duniya barnar Rasha
Mista Zelensky ya kuma yi wani abu da ya nuna wa duniya irin barnar da Rasha ta yi wa Ukraine, ta hanyar zagayawa zuwa biranen da aka lalata da kuma kai zuyara ga sojojin da ke fagen daga da asibitoci.

Ya yi tafiyarsa ta farko zuwa birnin Kudancin kasar da yaki ya daidaita a ranar Asabar inda ya yi zagaye a birnin Mykolaib.

A lokacin da ya kai, Mista Zelensky ya je ya duba gine-ginen da suka lalace haka kuma ya hadu da sojoji da jami’ai da ma’aikatan lafiya.

Haka kuma shugaban Ukraiendin ya kai ziyara birnin Odesa da ke Yammacin kasar wanda aka yi ta kai masa harin makamai masu linzami tun bayan da aka fara wannan yaki.

A cikin ‘yan makonnin nan, ya kai ziyara wasu daga cikin biranen da ake yaki ciki har da Kharki da ke Gabashin kasar, inda ya bijirewa dakarun Rasha ya je har wurin da ake tsananin yaki.