Aƙalla mutane biyar ne suka rasa rayukansu, yayin da aka ƙone gidaje da rumbunan abinci da dama, biyo bayan wani sabon hari da gungun ƴan bindigar da ke tserewa daga matsin lambar sumamen sojoji a Jihar Zamfara suka kai wa al’ummomin karkara a Jihar Neja.
Bayanai sun nuna cewa maharan sun tsallaka ne zuwa yankunan karkara na Jihar Neja domin neman sabuwar maɓoya da abinci bayan da dakarun sojojin Nijeriya suka tsananta luguden wuta a maɓoyarsu da ke dazuzzukan Zamfara. Shaidun gani da ido sun bayyana cewa ƴan bindigar sun kutsa cikin ƙauyukan ne a kan ɗimbin babura ɗauke da muggan makamai, inda suka buɗe wuta kan mutane tare da cinna wa gidaje wuta ba zato ba tsammani.
Harin ya yi sanadiyyar mutuwar mutane biyar a take, yayin da wasu da dama suka samu raunuka daban-daban a yayin da suke ƙoƙarin tserewa cikin daji domin tsira da rayukansu. Baya ga asarar rayuka, maharan sun banka wa gidaje da ɗakunan ajiyar hatsi wuta tare da kwashe dabbobi, lamarin da ya tilasta wa ɗaruruwan mazauna yankin yin gudun-hijira zuwa garuruwan da ke maƙwabtaka domin neman mafaka.
Majiyoyin tsaro da shugabannin al’umma sun bayyana cewa ƴan bindigar na cin gajiyar manyan dazuzzukan da suka haɗa jihohin Zamfara, da Kaduna, da Neja domin tserewa daga hare-haren sojoji tare da ƙaddamar da hare-haren ɓa-zata a ƙauyukan da ke kan iyakoki. Dakarun tsaro na haɗin gwiwa tare da ƴan banga na yankin sun garzaya wurin domin dawo da doka da oda da kuma fatattakar maharan.
Hukumomin tsaro a Jihar Neja sun tabbatar da tura ƙarin jami’ai domin toshe dukkan hanyoyin da ƴan bindigar ke amfani da su wajen tserewa daga Zamfara zuwa cikin jihar, tare da yin kira ga al’ummar yankunan kan iyaka da su hanzarta bayar da sahihan bayanan sirri kan duk wani motsi na ɓata-gari domin murƙushe su kafin su sake kafa sansani a yankin.
