A kwanan nan, kamfanin kimiyya da fasaha na kasar Sin Huawei ya sanar da τ-Law, wata ka’idar da ta shafi makomar sha’anin abubuwan hada kayan laturoni na “Semiconductor”, lamarin da ya girgiza kwararru masu nazarin kimiyya da fasaha, da masu zuba jari na kasashe daban daban.To amma da farko me ake nufi da τ-Law? Bisa ilimin da ya shafi laturoni, τ alama ce mai bayyana tsawon lokacin da ake bukata wajen sauya bayanin sadarwa.
Idan τ ya ragu, sassan na’urorin laturoni na Chips za su zama masu karin inganci. A baya, ka’idar Moore’s Law ta yi shekaru fiye da 50 tana shawo kan bangaren kirkira da samar da na’urorin Chips, wadda ta jaddada bukatar kankanta sassan hada Chips da ake kira Transister a-kai-a-kai, a kokarin inganta na’urorin Chips din. Sai dai wannan ka’ida na fuskantar wuyar ci gaba da kankantar na’ura, da karuwar kudin da ake kashewa wajen gudanar da aikin, matsalolin da suka raunana makomar sha’anin hada Chips.
Abun farin ciki shi ne sabuwar ka’idar da kamfanin kasar Sin ya gabatar a wannan karo, za ta taimaka wajen daidaita matsalolin. Ta hanyar rage τ, wato takaita lokacin da ake bukata wajen sauya bayanin sadarwa, za a samu damar inganta Chips ba tare da kankanta na’urorin Transister dake cikin Chips din sosai ba. Kana yadda kamfanin Huawei ya yi nasarar kirkira, da samar da na’urorin Chips nau’ika 381 a baya, bisa ka’idar τ-Law, ya tabbatar da gaskiyar ka’idar, da makomarta ta fuskar kasuwanci.Kazalika, wani abin mamaki shi ne, dalilin da ya sa kamfanin Huawei ya iya gabatar da ka’idar τ-Law a wannan karo, shi ne takunkumin da kasashen yamma suka kakaba masa, bisa yunkurinsu na hana kasar Sin ci gaba a fannin kimiyya da fasaha.
Sakamakon yadda kasar Amurka da wasu kasashen Turai suka yi babakere a bangaren samar da Chips mafi ci gaba, da kuma yadda suka hana kamfanin Huawei samun Chips din, da injuna masu ruwa da tsaki, ya sa wajibi kamfanin Huawei ya yi kokarin daidaita tsare-tsaren Chips na kansa, inda ya samu nasara, tare da kare matsayinsa na kasancewa kan gaba a duniya, ta fuskar fasahar hada Chips, da sauran bangarori daban daban.
Hakan ya nuna jajircewar kasar Sin, inda yunkurin tare hanyarta ke sanya ta kara samun ci gaba.To, ko mene ne asalin jajircewar Sin? Amsa ita ce burin Sin na raya kanta, don zama wata kasa mai cikakken karfin kimiyya da fasaha, da kwarewar da kasar ta samu a fannonin masana’antu, da kula da al’umma, yayin da take kokarin cika wannan buri. Ban da haka, wani babban dalilin da ya sa ake samun wannan jajircewa shi ne halayyar Sinawa ta dogaro da kai, da iya jure wahala.
A shekaru fiye da 10 da suka wuce, mun gane ma idanunmu yadda kasar Sin ta kawar da shingayen da aka sanya mata, ta samu nasara wajen kirkiro dimbin sabbin fasahohi, da samar da kayayyaki masu farin jini a duniya. Kana sabuwar ka’idar τ-Law da aka gabatar a wannan karo ta sake shaida cewa, duk wata wahala, ba za ta taba hana kasar Sin samun ci gaba ba. (Bello Wang)
