Shawarar da Manchester United ta yanke na korar tsohon kocinta Ruben Amorim da ma’aikatansa a lokacin da ya rage saura watanni 18 kwantiraginsa ya kare zai janyo mata asarar Yuro Miliyan 16.7 a cewar wata sanarwar da kulob din ya fitar a ranar Laraba.
An kori Amorim a watan Janairu amma wanda ya maye gurbinsa Michael Carrick ya jagoranci United inda ta kare a matsayi na uku a gasar Premier League har ta samu cancantar shiga gasar Zakarun Turai a kakar wasa mai zuwa.
Amorim ne kocin da kwantiraginsa yafi kowane tsada a tarihin Manchester United, hakazalika kungiyar ta biya tsohon kocinta Eric Ten Hag Yuro Miliyan 14.5 a lokacin da ta maye gurbinsa da Amorim, amma nadin Carrick a matsayin dan rikon kwarya (an tabbatar masa da aikin a makon da ya gabata) ya matukar amfanar da Red Devils din wajen sake farfadowa a wannan kakar wasan da aka kammala.
Kodayake United bata samu kudin shiga daga kwallon kafa ta Turai a wannan kakar ba, ta samu kudaden shiga akalla miliyan 520, kungiyar ta yi imanin cewa rage kudin da ake kashewa a kungiyar, tare da korar ma’aikatan kulob din, wanda aka aiwatar tun lokacin da Jim Ratcliffe ya karbi jagorancin Manchester United ya amfanar da kungiyar sosai.
