Jam’iyyar ADC ta ce haɗakar da ake yi ba don mara wa tsohon mataimakin shugaban kas5a, Atiku Abubakar, baya ba ne a zaɓen shugaban ƙasa na 2027.
Sakataren yaɗa labarai na jam’iyyar na ƙasa, Malam Bolaji Abdullahi, ne ya bayyana haka a wata hira da aka yi da shi a gidan talabijin na Channels a ranar Laraba.
- Faransa Za Ta Fara Jefa Kayan Agaji Ta Sama A Gaza
- Rikicin Makiyaya Da Manoma: An Kashe Mutum Daya, Gidaje 31 Sun Kone A Abuja
Ya ce wasu mutane ne ke yaɗa jita-jitar cewa ADC na goyon bayan Atiku domin su hana haɗakar yin nasara.
Ya bayyana cewa jam’iyyar ba ta da ɗan takara da ta ke mara wa baya a yanzu.
“ADC ba jam’iyyar Atiku ba ce. Wannan ba haɗakar Atiku ba ce kwata-kwata.”
Abdullahi ya ce tun kafin a kafa haɗakar, wasu sun riga sun fara yaɗa cewa an shirya ta ne domin Atiku.
Ya ƙara da cewa: “Ni ina da shekara 56, wa ya ce ba zan iya tsayawa takarar shugaban ƙasa ba?”
Da aka tambaye shi game da Peter Obi, tsohon ɗan takarar shugaban ƙasa na jam’iyyar LP, Abdullahi ya ce Obi na cikin haɗakar har yanzu.
Amma ya ce bai zama cikakken ɗan jam’iyyar ADC ba har yanzu.
Ya bayyana cewa jam’iyyar ADC ta bai wa Obi da kuma tsohon gwamnan Jihar Kaduna, Nasir El-Rufai, dama su fice daga jam’iyyunsu na yanzu wato LP da SDP.
Ya kuma ce Obi ba zai koma jam’iyyar PDP ba, duk da cewa jam’iyyar tana ƙoƙarin jawo ‘yan siyasa domin dawo da ƙarfinta.
Da aka tambaye shi dalilin da ya sa ‘yan Nijeriya za su yadda da jam’iyyarsu, Abdullahi ya ce jam’iyyar APC da ke mulki ta yi alƙawarin kawo sauyi amma ta gaza.
Don haka, ya ce lokaci ya yi da ‘yan Nijeriya za su gwada wata sabuwar tafiyar.
