Wani mutumin garin Enugu mai suna Ndubisi Uwadiegwu ya kashe matarsa mai suna Ogochukwu Enene,kan rikicin biredi da ya kaure tsakaninsu a Legas.
Rahotanni sun bayyana cewa, babban dan marigayiyar ya zargi babansa da yi wa babarsa dukan kawo wuka wanda kuma ya yi sanadiyyar mutuwarta saboda ta ce ya sayo musu biredi, bayan ya gaya mata cewa, ba shi da kudi.
Yaron mai shekara 14 ya yi bayanin cewa, mahaifiyarsa na amfani da kudinta ta sayo wa yaranta biredi, amma sai Ndubuisi ya dauke biredin ya cinye.
Lokacin da matar ta sa ke tambayarsa kan mai ya sa yake dauke mata biredin, ba tare da ya sayo wa yaran wani ba, sai Ndubisi ya fara dukanta ko ta ina, nan take ta fadi ranga-ranga, kafin wani lokaci ta mutu.
Bayan kashe Ogochukwu, sai mijin ya fara tunanin inda zai binne gawar a boye, ba tare da sanin ‘yan uwanta ba.
Kisan na ta ya jawo maganganu daban-daban, makusantanta sun yada hotonta a kafaofin sadarwa daban-daban inda suka bukaci a tabbatar da adalci a kan wannan batu.
Wata majiya da ke kusa da mahaifinta ta bayyana cewa, mahaifin ya ce, Ogochukwu Anene ‘yar asalin kauyen Umuokpu. Tana karatu a makarantar sakandiren ‘yan mata ta Amenyi.
