Tsaikon na’urar lantarki ya janyo cikas da kawo tashin taro ba shiri a gangamin yakin neman jam’iyyar APC da ya gudana ranar Litinin a jihar Bauchi.
Lamarin ya sanya shugaban kasa, Muhammadu Buhari, da dan takarar shugaban kasa na jam’iyyar APC, Bola Ahmed Tinubu, ba su samu damar yin magana ba yayin taron da aka gudanar a filin wasa da ke jihar.
- Awanni 72 Da Ficewa Daga Tafiyar Tinubu Da APC, Naja’atu Muhammad Ta Ziyarci Atiku
- 2023: Ina Neman Tazarce Ne Domin Cigaba Da Shimfida Ayyukan Raya Bauchi – Gwamna Bala
Wakilinmu ya labarto mana cewa, taron da aka gudanar don mika tuta ga dan takarar shugaban kasa na jam’iyyar da na gwamnan Jihar Bauchi, Sadique Baba Abubakar (Mai ritaya), a gaban dubban jama’a amma hakan bai samu armashi ba ba sakamakon katsewar sauti.
Lamarin wanda ya faru sakamakon yankewar wayar wuta da ta hada kayayyakin maganar wajen taron.
Babban taron ya samu halartar dumbin jama’a da manyan baki da suka hada da gwamnonin jihohi da dama da Ministoci da tsoffin Gwamnoni da masu ruwa da tsaki na jam’iyyar APC.
An dauki tsaron mintina ana taron rimi-rimi kwatsam abun magana ya tsaya cak sa’ilin da shugaban jam’iyyar APC na kasa, Sanata Abdullahi Adamu, ke gabatar da jawabinsa.
