‘Yan Bindiga Sun Yi Dirar Mikiya Wurin Taro, Sun Kashe Shugaban Al’umma A Imo 

‘Yan bindiga sun mamaye kauyen Ngali, yankin Logara a karamar hukumar Ngor Okpala da ke jihar Imo tare da kashe shugaban yankin a ranar Laraba.

LEADERSHIP ta labarto cewa Shugaban al’ummar mai suna Chief Monday Eke yayin da ya ke tsaka da yin jawabi ga makusantansa a dakin taron kauyen ne kwatsam ‘yan bindigan suka diro a wata mota kirar Camry mai launin jaa tare da harbeshi gami da arcewa.

• Zaben Gwamnan Adamawa: Kotu Ta Kori Karar Da Binani Ta Kai INEC

Wata majiya da ta nemi a sakaye sunanta ta shaida mana cewa, motar da masu bindigar suka yi amfani da ita sun kwaceta ne a hannun wani mai suna Mr Obum da ya zo jana’izar mahaifiyarsa amma sun yasar da motar suka yi gaba.

Majiyar na cewa, “Yan bindigan da suka zo da manyan bindigogi sun rufe fuskokinsu. Wannan lamarin ya tada wa kowa da kowa hankali don lallai akwai mai basu bayanai. Ko a watar da ta gabata, wani mutum da muka sani da Papa Mayor shi ma an kasheshi a gidansa wanda wasu ‘yan bindigan da ba a sani ba suka yi. Ba mu san meye yake faruwa a yankinmu ba kuma.”

Idan za a iya tunawa a makon jiya, ‘yansanda guda biyar da ma’aurata an kashe su a mashigar Okpala, a yayin da watar da ta wuce, wasu ‘yan bindiga sun Kashe wasu jami’an tsaro Nigeria Security and Civil Defence Corps su uku a kasuwar Eke Isu Market da ke yankin Obiangwu, dukka a karamar hukumar, Ngor Okpala da ke jihar ta Imo.