Hukumar samar da aikin yi ta kasa (NDE) reshen jihar Sakkwato ta fara rijistar marasa aiki a jihar wanda za a kai har zuwa 9 ga Mayu, 2023 ana yi a dukkan kananan hukumomi 23 na jihar.
Aikin rajistar ya samu halartan wakilin shugaban bangaren bincike da tsare-tsare (PR&S) na Hedikwatar Hukumar da ke Abuja Mallam Umar Aliyu da kuma wakilin kodineta na jihar Mal. Suleiman Adamu Kangiwa.
Ana gudanar da aikin rijistar ne a ofishin NDE na jihar Sokoto da kuma na kananan hukumomi 23 sannan aka rabasu zuwa unguwanni domin kaucewa cunkoson jama’a da kuma tabbatar da samun ingataccen tsari.
Tawagar sa ido karkashin jagorancin wakilin kodineta na jiha da wakilin shugaba a PR&S da ke Hedikwatar Abuja da sauran ma’aikatan da ke tallafawa ofishin NDE na jihar Sokoto sun zagaya wasu kananan hukumomin a rana ta farko da suka hada da Sakkwato ta Kudu, Sakkwato ta Arewa, Wamakko da Bodinga.
