Kotu Ta Rushe Zaben Kakakin Majalisar Gombe Da Umarnin Sake Zabe Nan Da Kwanaki 30

Kotun sauraren kararrakin zaben gwamnan jihar Gombe da ta yi zamanta a Gombe, a ranar Talata, ta yi watsi da nasarar zaben shugaban majalisar dokokin jihar, Hon. Abubakar Leggerowo.

Idan za a iya tunawa dai an zabi shugaban majalisar ne a karkashin jam’iyyar APC mai mulki don wakiltar mazabar Akko ta tsakiya a majalisar dokokin jihar sai dai kuma babban abokin hamayyarsa a zaben, Alhaji Bashir Abdullahi, na jam’iyyar PDP. ya kalubalanci nasarar da ya samu a kotu.

• Gwamnan Gombe Ya Yaba Da Hukuncin Kotu Kan Tabbatar Da Nasarar Shugaba Tinubu
• Har Yanzu Majalisar Dokokin Gombe Ba Ta Tantance Kwamishinoni Ba

Kotun karkashin mai shari’a Michael Ugar ta soke zaben shugaban majalisar ne saboda hukumar zabe mai zaman kanta ta kasa INEC ta soke kuri’un da aka kada a wasu rumfunan zabe a mazabar wanda mai shigar da kara ya koka da shi a gaban kotun cewa matakin ya bai wa wanda ake kara nasara da ba ta dace ba a zaben ranar 18 ga Maris, 2023.

Mai shari’a Ugar ya yanke hukuncin cewa soke sakamakon zabe mai lamba 001, 024 da 014 na Kumo ta Gabas a karamar hukumar Akko a jihar an yi kuskure tare da ba INEC umarnin ta sake gudanar da zabe cikin kwanaki 30 masu zuwa don tantance ainihin wanda ya lashe zaben kujerar majalisar.

Sai dai kakakin majalisar Leggerowo ya nuna rashin gamsuwa da hukuncin da kotun ta yanke kuma ya sha alwashin daukaka kara a gaban kotun daukaka kara cikin gaggawa.