Mai Martaba Sarkin Zazzau, Malam Ahmed Nuhu Bamalli ya nuna matukar damuwarsa na yadda wasu gun-gun mahara suka sace shanu fiye da dubu daya a garin Tankarau a gundumar Dutsen Abba na masarautar Zazzau.
Sarkin Zazzau ya nuna damuwar ce ta bakin Ardon Zazzau, Alhaji Umar Abubakar Sadik a lokacin da ya ziyarci garin Tankarau bisa umurnin sarkin domin jajanta wa al’ummar kan wannan lamari.
- Sarkin Zazzau Ya Buƙaci Addu’ar Zaman Lafiya Da Kwanciyar Hankali
- Sau Daya Tak Gwamnati Ta Biya Karin Albashi Na N35, 000 – TUC
Mai Martaba Sarkin Zazzau ya tunatar da al’ummar da suka tsinci kansu a wannan mummunar iftila’i da su fauwala wa mai duk domin shi ne zai masu sakayya na abin da suka rasa na shanunsu.
Ya kuma yi kira ga hukumomin bayar da agaji da su bai wa wannan al’umma agajin da zai rage masu radadin matsalar da suke shiga.
Shi kuwa Sarkin Fulanin Tankarau, Alhaji Lawal Nuhu ya nuna godiyarsa ga mai martaba Sarkin Zazzau bisa jajanta masu na satar shanun da aka yi masu.
Sannan kuma Alhaji Lawal ya nuna matukar jin dadinsa da kuma hangen nesar da ya yi na nada Alhaji Umar Abubakar a matsayin Ardon Zazzau.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
