Hukumar Kare hakkin Masu sayayya (KSCPC) ta jihar Kano ta kama buhunan fulawa 487 da ta lalace a wani dakin ajiyar kaya dake kasuwar abinci ta Dawanau a Kano.
A wata sanarwa dauke da sa hannun jami’in yada labarai na Hukumar, Musbahu Aminu Yakasai, mukaddashin Manajan Darakta na KSCPC, Dokta Baffa Babba Dan’Agundi, ya ce kamen ya samu nasara ne biyo bayan wasu bayanan sirri da Hukumar ta samu daga wasu masu kishin Kasa.
Dan’Agundi wanda babban mataimaki na musamman ne ga gwamna kan tabbatar da ingancin kayayyakin masarufi, wanda Salisu Muhammad ya wakilta ya bayyana cewa gwajin da aka yi a dakin gwaje-gwaje ya tabbatar da cewa fulawar ta riga ta lalace.
Hukumar KSCPC ta kuma sake bankado Wasu kayan sha a kasuwar Sabon gari wadanda su ma sun riga sun gurbata tuni.
