Yadda Ake ‘Hot Chocolate’

Assalamu alaikum masu karatu, barkammu da sake haduwa da ku a wannan makon cikin shirinmu mai farin jini da albarka na Girki Adon Mata.

A yau shafin namu zai kawo muku yadda ake Hot Chocolate:

Abubuwa da ya katamata uwargida ta tanada:
Madara, Nutaila, Oriyo Kokis.
Yadda ake hadawa:
Da farko za ki dora ruwa a wuta sannan sai ki zuba madara ki zuba Nutailar kamar cokali biyu haka sai ki saka maburkati kina juyawa har sai ya dan yi kauri haka ya dan fi shayi kauri da kadan sai ki bar shi ya yi ta tafasa zai zama kalar kasa-kasa haka sai sauke shi, in kin yi hakan ma ya yi. Ana shan sa da Kokis.

Wani hadin daban kuma:
Ga abubuwan da ake bukata:
Cakulet Siruf, farin mashmilos, kokofauda, madara.

Yadda ake hadawa:
Za ki dora ruwa a wuta sai ki zuba madara ki kada shi ya kadu sosai ki bar shi ya tafasa, sannan ki samu tukunyar masa ki shafa mata cakolet siruf sannan ki bar shi kamar minti 10 ya bushe sai ki ciro shi za ki ga ya yi kamar kwantena, sai ki zuba kokofauda, sannan ki saka farin mashmelos kamar uku a kowacce kwantena sai ki rufe shi kowanne da dan uwansa sannan sai ki kara zuba cakolet sirof din a sama, sannan ki dauko wannan madarar da kika dafa ki zuba a kofi sai ki rika sa guda-guda kina sha in kika sa za ki ga ya baje. A sha dadi lafiya.