An kashe wani kasurgumin dan bindiga mai suna ‘Dangote’ a wani artabu da ‘yan sansanin Kachalla Dankarami da ke dajin Dumburun da ke tsakanin karamar hukumar Batsari da Jibiya a jihar Katsina.
An kashe Dangote ne tare da ‘yan uwansa guda biyu, Lama Na Balewa da Usman Yellow, a wani rikici da aka ce ya barke tsakanin sansanoni biyu.
- Dalilin Haramta Tafiyar Dare A Iyakokinmu Da Katsina Da Sokoto – Gwamnatin Zamfara
- Duk Da Ayyana Nemansa Ruwa A Jallo, Dakta Idris Dutsen Tanshi Ya Dawo Bauchi
Wata majiya mai tushe wacce ta tabbatar da faruwar lamarin, ta bayyana cewa, wasu yaran Kachalla Dankarami ne suka yi awon gaba da wasu shanu na sansanin Dangote.
Nan take, wani dan uwan Dangote tare da wasu 10 suka yi yunkurin kwato shanun, hakan ya yi sanadin mutuwar wasu, sauran kuma suka tsira da harbin Bindiga sakamakon kwanton bauna da yaran Kachalla suka yi musu, hakan bai yi wa Dangote dadi ba.
Da yake samun labarin rasuwar dan uwansa, Dangote ya fusata, a fusace ya tara yaransa da su bi Dankarami da yaransa, amma sai ya yi rashin sa’a, wanda a karshe ya yi asarar ransa, yayin da Kachalla da yaransa suka sake yi masa kwanton bauna da muggan makamai.
Har zuwa lokacin hada wannan rahoto, rundunar ‘yansandan jihar Katsina ba ta ce uffan ba kan lamarin.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
