Maulidi: Fityanul Islam Ta Jajanta Wa Al’ummar Borno Kan Ibtila’in Ambaliyar Ruwa

Kungiyar Fityanul Islam ta kasa ta taya daukacin al’ummar Musulmi murnar zagayowar Maulidi tare da jajanta wa al’ummar Jihar Borno kan ibtila’in ambaliyar ruwa wadda ta yi nasadin asarar miliyoyin nairori.

Ta bukaci daukacin al’ummar Musulmi da su kara kaimi wajen gudanar addu’o’i domin samun saukin musibun da suka dabaibaye al’ummar kasar nan.

• Bana Cikin Wani Shiri Na Tsige Sanusi II A Matsayin Sarkin Kano – Ganduje
• Dakta Gadan-ƙaya Ya Bada Haƙuri Kan Zargin Auren Jinsi Da Ya Yi A Bauchi

A wata sanarwa da darakta janar na yada labaran kungiyar, Ustaz Sani Ibn Salihu ya raba wa manema labarai a Abuja, ya ce kungiyar Fityanu tana jajanta wa daukacin al’ummar Jihar Borno bisa iftila’in ambaliyar ruwar da same su.

Ya yi kira ga hukumomi da ofisohin jakadanci da sauran bangarori na kasashen waje da na gida Nijeriya da su tallafa wa wadanda ambaliyar ruwa ta shafa domin kai musu agajin gaggawa.

Sanarwar ta bukaci al’ummar Musulmi da su yi amfani da bikin Maulidi domin koyi da kyawawan dabi’un Manzon Rahma Muhammadu (SAW) domin samun rabauta ranar gobe kiyama.

Kungiyar ta kuma taya Musulmin kasar nan murnar ranar Maulidi wanda aka gudanar a daidai lokacin da kasar ke fama da matsaloli masu yawan gaske wanda suke bukatar addu’a.