Na Samu Wata Harkar Da Ta Fi Sana’ar Fim Kawo Kudade -Ali Dawayya

Daya daga cikin jarumai maza da aka dade ana damawa dasu a masana’antar Kannywood tsawon lokaci Ali Dawayya yayin zantawa da jarumar Kannywood Hadiza Gabon a cikin shirinta mai suna Gabon’s Room Talk Show ya bayyana cewar a yanzu harkar da yake yi yafi samun kudin shiga fiye da fina finan da yayi a baya.

Ali Dawayya ya ce harkar fim wata harka ce da ba kowane lokaci ne ake yi ba,za a iya yin fim a yanzu sannan a shafe tsawon watanni ba tare da an sake yin wani shirin fim ba,ba kamar kasuwa da zaka fita yau ka samu kudi kuma ka fita gobe ka samu ba in ji shi.

• Yadda Ake Kosan Filantan
• Mutane Na Yi Min Fatan Mutuwa Saboda Rawar Da Na Taka A Shirin Garwashi -Baba Lami

A harkar fim ana samun kudade amma ba kowane lokaci ne ake yi ba saboda haka idan ka dogara kacokan a kan fim to wata rana zaka nemi kudin da zaka yi cefane ka rasa saboda ba abu ne wanda ake yi kullum kullum ba in ji shi.

Yanzu da nake sana’ar Bolt (Zirga Zirga) nikan samu fiye da abinda nike samu a harkar fim domin kuwa idan wani ya bukaci in dauke shi zuwa wata unguwa na dauke shi, zai ji dadin aiki tare dani kuma zai ji a ransa yau dan fim ne ya dauko ni a mota hakan zai sa ya bani fiye da abinda muka yi dashi zai bani saboda jin dadin aikin da na yi mashi in ji Dawayya.

Daga karshe jarumin ya bukaci sabbin jini ko kuma matasa masu sha’awar shiga wannan harka ta fim da su tabbatar suna da wata sana’ar da za su rike ta daban, domin kuwa kar harkar fim ko daukaka ta sa ka saki ainahin sana’a ko kasuwancin da ka iya, idan kuwa ka yi hakan wata rana zaka yi danasani ya kara da cewa.-Ali Dawayya