A yau Asabar 25 ga wannan wata, ofishin kula da harkokin yankin Taiwan na kwamitin tsakiya na jam’iyyar Kwaminis ta kasar Sin da ofishin kula da harkokin yankin Taiwan na majalisar gudanarwar kasar sun gudanar da liyafar murnar kebe ranar tunawa da kawo karshen mulkin mallakar Japan a yankin Taiwan, a dakin taro na Diaoyutai dake birnin Beijing. Wakilan bangarori daban daban na yankin Taiwan da na babban yankin kasar Sin masu halartar bikin murnar cika shekaru 80 da kawo karshen mulkin mallakar Japan a yankin Taiwan da safiyar wannan rana sun halarci liyafar.
Direktan ofishin kula da harkokin yankin Taiwan na kwamitin tsakiya na jam’iyyar Kwaminis ta Sin da ofishin kula da harkokin yankin Taiwan na majalisar gudanarwar kasar Song Tao ya yi jawabi a gun liyafar cewa, an kebe ranar tunawa da kawo karshen mulkin mallakar Japan a yankin Taiwan a yayin cika shekaru 80 da kawo karshen mulkin mallakar Japan a yankin, wanda babban sakataren kwamitin tsakiya na JKS Xi Jinping ya gabatar, kuma zaunannen kwamitin majalisar wakilan jama’ar kasar ya yi bincike tare da zartas da batun bisa dokoki, kuma wannan ya biya bukatun jama’ar kasar Sin da cimma burin dukkan kasar baki daya.
Kebe wannan rana, muhimmin aiki ne ga kasar Sin wajen tunawa da tarihin kasar da jaruman da suka ba da gudummawa ga kasar, da kuma sa kaimi ga tabbatar da ka’idar Sin daya tak a duniya, da kin amincewa da ‘yan aware na yankin Taiwan da masu tsoma baki kan harkokin cikin gida na kasar Sin, da kuma nuna goyon baya ga bangarori masu kaunar kasa da neman dinkuwar duk kasar Sin. Muna da karfi wajen yaki da ‘yan aware na yankin Taiwan, da sa kaimi ga samun zaman lafiya da bunkasuwa a tsakanin gabobi biyu na mashigin tekun Taiwan.
Ya kara da cewa, muna son zurfafa mu’amala da hadin gwiwa a tsakanin gabobin biyu, da raya al’ummar kasar Sin baki daya. Hakazalika, mun yi imani da sa kaimi ga samun dinkuwar duk kasar Sin, da kawo moriya ga jama’ar yankin Taiwan. Muna da karfi wajen tinkarar kalubale, da yin kokarin cimma burin farfadowar al’ummar kasar. (Zainab Zhang)
