‘Yan Bindiga Sun Yi Awon Gaba Da Shinkafar Kirsimeti A Kaduna

A yayin da ake shagulgulan bikin Kirsimiti, wasu gungun ‘yan bindiga sun yi awon gaba da kayan abincin da aka tanada domin bikin Kirsimeti a yankin karamar hukumar Kachiya da ke kudancin Jihar Kaduna.

Rahotannin sun bayyana cewar ‘yan bindigar sun kwace kayayyakin abincin mallakin wani magidanci da ya saya domin bikin Kirsimeti a yankin Gidan Abe na karamar hukumar Kachia a Jihar Kaduna.

• Sojoji Sun Daƙile Harin Jirgi Mara Matuƙi A Yobe
• Muhammad Bashir Ya Zama Sakataren Yaɗa Labaran Ƙungiyar Tsofaffin Ɗaliban AKCILS

Wani basaraken kauyen ya tabbatar wa wakilinmu cewa a ranar Asabar ‘yan ta’addan suka kai wa mutumin hari tare da kwace kayan abincin Kirsimetin.

Ya bayyana cewa mutumin yana hanyar dawowa daga kauyen Gidan Abe wajen sayo buhunan shinkafa da kayan miya da sauransu a Katari ne maharan da ke kan babura suka tare shi da bakin bindiga.

Basaraken ya bayyana cewa bayan kwace duk kayan abincin da mutumin ya saya, sai maharan suka hau baburansu suka tsere da su, ba tare da harbin kowa ba.

Ya ce, “Na samu bayani daga kauyen Katari inda na kai ziyara cewa ‘yan bindiga a kan babur sun kwace wa wani mutum da ke ka babur kayan abinci a hanyarsa ta dawowa kauyen Gidan Abe domin bikin Kirsimeti.”

Wakilinmu bai samu kakakin ‘yansanda na Jihar Kaduna ba, ASP Hassan Mansur, domin jin ta bakinsa game da wannan al’amari duk da cewa gwamnatin Jihar Kaduna ta ce ta yi tanadi makyau domin kare rayuka da dukiyoyin al’ummar jihar yayin gudanar da bukukuwan Kirsimiti da na sabuwar shekara.