Rundunar Sojin Ruwa Ta Nijeriya Ta Lalata Haramtattun Matatun Mai 5 A Ribas

Jami’an Rundunar Sojojin Ruwa ta Nijeriya (NNS) PATHFINDER sun tarwatsa wasu haramtattun wuraren tace man fetur a karamar hukumar Ogba/Egbema/Ndoni da ke jihar Ribas.

Wuraren, wadanda ake amfani da su wajen ayyukan hada-hadar tacewa da ajiyar haramtattun kayayyaki a yankin, suna da tanda 62, tafki 21, da ramuka 55 masu dauke da kusan lita 50,000 na danyen mai, lita 83,000 na man dizal (AGO) da kuma lita 20 na man kananzir.

• PLA Reshen Kudancin Kasar Ta Yi Sintiri Na Hadin Gwiwa A Tekun Kudancin Sin
• Yansanda Sun Fara Tsananta Daukar Mataki Kan Yan Daba A Kano

Kwamandan, NNS PATHFINDER, Commodore Cajethan Nnabuchi Aniaku ya bayyana hakan a cikin wata sanarwa da ya sanyawa hannu da kan sa kuma ya rabawa manema labarai a Fatakwal a daren Lahadi.

Aniaku ya bayyana cewa, an samu nasarar aikin yaki da satar danyen mai a yankin, ta hanyar amfani da bayanan sirri da NNS PATHFINDER ta samu kuma ta aiwatar cikin nasara.

Aniaku, ya kara nanata cewa, rundunar sojojin ruwan Nijeriya karkashin jagorancin babban hafsan hafsoshin ruwa, Vice Admiral Emmanuel Ogalla, za ta ci gaba da jajircewa wajen yaki da satar danyen mai, wadanda ke haifar da babbar barazana ga tattalin arzikin kasar da kuma samar da makamashi.