Sufeto Janar na ‘yansandan Nijeriya, IGP Kayode Egbetokun, ya umarci sashen sa ido na ‘yansanda da ya mika masa mai magana da yawun gwamna Abba Yusuf, Sanusi Bature Dawakin Tofa a hedikwatar rundunar da ke Abuja bisa zargin bata suna da kitsa zargin dakatar da shugaban jam’iyyar APC na kasa, Abdullahi Ganduje daga jam’iyyar a matakin shiyya ta jihar Kano.
Idan za a tuna a shekarar 2024, shugabancin jam’iyyar APC na gundumar Ganduje a karamar hukumar Dawakin Tofa ta dakatar da Ganduje daga zama mamba a kan abin da suka bayyana a matsayin zagon kasa ga jam’iyya da rashin biyansu hakkokinsu.
- Rundunar Sojin Ruwa Ta Nijeriya Ta Lalata Haramtattun Matatun Mai 5 A Ribas
- PLA Reshen Kudancin Kasar Ta Yi Sintiri Na Hadin Gwiwa A Tekun Kudancin Sin
Dakatarwar, ana zargin mai taimakawa gwamnan jihar Kano kan harkokin yada labarai ne ya shirya ta, wanda ya fito daga karamar hukuma daya da Ganduje.
A cikin wata wasika mai kwanan wata 23 ga Mayu, 2025, mai lamba CR/3000/IGP-SEC/MU/ADM/14/ABJ/VOL 118/57, wacce aka aike wa sakataren gwamnatin jihar Kano, na cewa, IGP ya bukaci a mika Bature zuwa gaban wani jami’i, SP Mojirode B. Obisiji a ranar Alhamis 29 ga Mayu, 2025, domin amsa tambayoyi.
In ba a manta ba, IGP a watan Disamba, 2024 ya ba da irin wannan umarni tare da tura jami’an sa ido na IGP domin su kamo mai magana da yawun Gwamnan Kano tare da kai shi hedikwatar rundunar da ke Abuja.
