Rasuwar Dantata Babban Rashi Ne Ga Afirka – Atiku

Tsohon Mataimakin Shugaban Ƙasa, Atiku Abubakar, ya bayyana rasuwar attajiri kuma mai taimakon al’umma, Alhaji Aminu Dantata, a matsayin babban rashi ba kawai ga Jihar Kano ba, har ma ga Nijeriya da Nahiyar Afirka baki ɗaya. 

Ya yaba da irin gudummawar da Dantata ya bayar wajen bunƙasa tattalin arziƙi da samar da ayyukan yi.

• Sin Ta Samu Nasarorin A Zo A Gani Wajen Yaki Da Miyagun Kwayoyi
• Bam Ya Kashe Mutane 4, Ya Jikkata 21 A Yobe

A cikin wata sanarwa daga ofishin yaɗa labaransa, Atiku ya ce ya ji matuƙar baƙin ciki da rasuwar wannan gogaggen ɗan kasuwa wanda ya shahara sosai a Nijeriya da Afirka.

“Aminu Dantata ya kasance sanannen ɗan kasuwa na tsawon shekaru da dama. Ya zaburar da matasa da dama su shiga harkar kasuwanci,” in ji Atiku.

“Ba za a iya tattauna harkokin kasuwanci a Nijeriya ba tare da an ambaci sunan dangin Dantata ba.”

Atiku, wanda ya tsaya takarar shugaban ƙasa a ƙarƙashin jam’iyyar PDP a 2023, ya bayyana Dantata a matsayin jarumin da ke ɗaukar kasada a harkokin kasuwanci, wanda ya ce wata muhimmiyar ɗabi’a ce ta manyan masu saka hannun jari.

Ya yaba da yadda Dantata ya sauya kasuwancin danginsu daga saye da sayarwa ta hanyar gargajiya zuwa aikin gine-gine da injiniyanci na zamani, wanda hakan ya samar da dubban ayyukan yi ga ‘yan Nijeriya.

Atiku ya kuma nuna girmamawa ga Dantata bisa irin taimakon da yake yi wa jama’a cikin sirri ba tare da neman ɗaukaka ko yabo ba.

“Ya kasance mai dukiya sosai amma bai taɓa nuna girman kai ba, wannan ɗabi’a ce da ba kowa ke da ita ba,” in ji Atiku.

“Ya kasance abin koyi kuma tushen ƙarfafawa ga mutane da dama.”

Ya ƙara da cewa Dantata mutum ne mai son zaman lafiya wanda ya guji maganganun da ke kawo rabuwar kau, kuma ya jajirce wajen ƙarfafa zaman lafiya a tsakanin ‘yan Nijeriya.

Atiku ya shawarci Gwamnatin Tarayya da ta girmama Dantata ta hanyar sanya sunansa a wani muhimmin gini ko cibiyar gwamnati, domin tunawa da gudunmawarsa ga ci gaban al’umma da tattalin arziƙin ƙasa.