Allah Ya Yi Wa Dan Janar Sani Abacha Rasuwa 

Abdullahi Abacha, wanda shi ne da na biyun karshe ga tsohon shugaban mulkin sojin Nijeriya, Janar Sani Abacha, ya rasu yana da shekara 36 a duniya.

Iyalin Abacha sun tabbatar rasuwarsa a yau Asabar, inda suka ce Abdullahi ya rasu ne cikin dare a gidansu da ke titin Nelson Mandela a Abuja, babban birnin tarayya.

• Sojoji Sun Kashe Mutum 1, Sun Ceto 14 Da Aka Yi Garkuwa Da Su A Kaduna
• Ra’ayoyin PDP, PRP Da SDP Kan Gudanar Da Zabe A Kano

“A daren jiya fa lafiyarsa kalau ya kwanta, amma yau da safe sai gawarsa a ka samu.

“Ya rasu cikin kwanciyar hankali a cikin barcinsa,” in ji wata majiya daga iyalin Abacha.

Leadership Hausa ta tattaro cewa za a yi jana’izarsa da misalin karfe 4 na yamma a babban masallacin kasa da ke Abuja.

An haife shi a shekarar 1987, marigayin yana daya daga cikin yara tara da marigayi shugaban soji ya bari.

Tuni ‘yan uwa da abokan arziki suka shiga alhini da gaisuwar rasuwar matashi a kafafen sada zumunta.