Gwamnan Jihar Kano, Abba Kabir Yusuf, ya miƙa sunayen mutane biyu ga Majalisar Dokokin Jihar domin tantancewa da tabbatar da su a matsayin kwamishinoni.
Mutanen biyu sun haɗa da mai magana da yawun gwamnan, Sanusi Bature Dawakin Tofa, da tsohon Kakakin Majalisar Dokokin Jihar Kano a zamanin tsohon Gwamna Ibrahim Shekarau, Hon. Balarabe Sa’idu Gani.
Ana sa ran Majalisar za ta gudanar da tantancewar a ranar Talata, 3 ga Nuwamba, 2026, da ƙarfe 10:00 na safe.
A cikin wata sanarwa da Kakakin Majalisar, Kamaluddeen Sani Shawai, ya fitar ranar Litinin, ya ce Majalisar ta karɓi wasiƙar buƙatar tantance mutanen biyu daga Gwamna Abba Kabir Yusuf.
Ya ƙara da cewa za a gudanar da tantancewar ne bisa tanade-tanaden Kundin Tsarin Mulkin Tarayyar Nijeriya.
Sanarwar ta kuma bayyana cewa Shugaban Majalisar, Rt. Hon. Jibril Isma’il Falgore, ne zai jagoranci zaman tantancewar.
Sanusi Bature Dawakin Tofa shi ne mai magana da yawun Gwamna Abba Kabir Yusuf, kuma yana cikin mutanen biyu da gwamnan ya miƙa sunayensu domin tantancewa da yiwuwar naɗa su a matsayin kwamishinoni a gwamnatin jihar.
