Gwamnatin jihar Bauchi, ƙarƙashin jagorancin Gwamna Bala Mohammed, ta ƙaddamar da sabbin dakarun tsaron daji (Forest Guards) guda 2,187 waɗanda aka bawa horo na musamman domin yaƙi da ta’addanci, da garkuwa da mutane.
Gwamnan ya bayyana cewa an rarraba waɗannan dakarun ne zuwa ɗaukacin ƙananan hukumomi 20 na jihar, inda za su riƙa aiki kafaɗa-da-kafada da hukumomin tsaro na gwamnatin tarayya don tabbatar da tsaron rayuka da dukiyoyin al’umma.
A lokacin da yake jawabi a wurin taron rantsar da dakarun, Gwamna Bala ya bayyana cewa an ɗauki wannan matakin ne domin kare dazukan jihar da ke zama maboyar ‘yan fashi da masu garkuwa da mutane, musamman dajin Lame-Burra. Gwamnatin ta samar wa dakarun kayayyakin aiki na zamani da suka haɗa da motoci, da babura, da sauran kayan kariya domin ba su damar shiga sassan dazuka mafi wahala wajen fatattakar ɓata-gari.
Gwamnan ya jaddada cewa dakarun tsaron dajin sun fito ne daga cikin al’ummomin yankunan daban-daban, wanda hakan zai ba su damar amfani da sanin da suka yi wa yankunansu wajen tattaro bayanan sirri cikin sauƙi. Ya kuma yi kashedi mai tsanani ga dakarun cewa gwamnati ba za ta aminta da rashin ɗa’a, ko cin hanci, ko cin zarafin fararen hula ba, inda ya buƙace su da su gudanar da ayyukansu cikin gaskiya da adalci.
Daga ƙarshe, shugabannin hukumomin tsaro na jihar da sarakunan gargajiya sun yaba da wannan namijin ƙoƙari na gwamnatin jihar, inda suka bayyana shi a matsayin babban mataki na dawo da zaman lafiya.
Sun yi alƙawarin ba wa sabbin dakarun dukkan gudunmawar da ake buƙata, yayin da aka buƙaci mazauna jihar su riƙa kai rahoton duk wani motsi na shakku ga jami’an tsaro cikin gaggawa.
