An kashe mutane shida bayan wasu da ake zargin Fulani ne suka kai hari Tasha-Rimi, yankin al’ummar Kammuku da ke ƙaramar hukumar Rafi a Jihar Neja.
Harin ya faru da daddare, inda rahotanni suka ce Musa Bahago da ɗansa, Hamisu Musa, na cikin waɗanda aka kashe.
Shugaban ƙauyen Tasha-Rimi, Alhaji Garba Mohammed Bissalla, ya tabbatar da faruwar lamarin, yana mai cewa al’ummar yankin sun shiga firgici sakamakon harin.
Ya ce mazauna yankin suna bin kiran gwamnatin jihar na zaman lafiya, bayan wasu rikice-rikice da suka faru a baya tsakanin al’ummar Kammuku da Fulani.
Kimani watanni uku da suka gabata, rikici tsakanin ƙungiyoyin biyu kan gonaki da hanyoyin kiwo ya yi sanadin mutuwar sama da mutane 20 a yankin.
Ana jiran samun ƙarin bayani kan sabon harin.














