Atiku Zai Yi Wa Tinubu Kwab Ɗaya, Don Ba Tsaransa Ba Ne, In Ji PDP

Jam’iyyar PDP mai adawa ta yiwa Asiwaju Bola Ahmed Tinubu shagube kan yadda ya kashe makudan kudade ga Deliget domin ya samu tikitin tsaya wa takarar shugaban kasa a inuwar jamiyyarsa, APC.

“Ina tausaya wa Asiwaju ganin cewa tafiyarsa ta neman shugabancin kasa, babu inda za ta kai shi domin Asiwaju ba tsaran Atiku Abubakar ba ne, Atiku ya fi shi cancanta, anfi sanin Atiku kuma ya fi Asiwaju shirya wa don tunkarar zaben 2023, Atiku shi ne zabin ‘yan kasar nan.

• Tinubu Ne Basillar Dinke Baraka –Ganduje

“PDP ta kayar da shugaba Muhammadu Buhari a sahihin zaben shugaban kasa na 2019, nan bada dadewa ba Asiwaju zai gane cewa ba irinsa Nijeriya ke bukata ba.

“Kwanaki kadan ya rage ‘yan Nijeriya su gano rawar da Asiwaju ya taka wajen dora Gwamnatin shugaba Buhari da ta Gaza a kan mulki, inda mulkin ya jefa rayuwar ‘yan Nijeriya kangin talauci da karayar tattalin arzikinsu da zubar da jinin ‘yan kasar da aikata ayyukan ta’addanci da kashe-kashen rayuka da raba kan ‘yan kasar da taka doka da yawan sace dukiyar kasa.” Inji Ikirarin Jam’iyyar PDP.

A cewar PDP, ya kamata Asiwaju ya sani cewa, salon siyasar Nijeriya ta dara ta jihar Legas nesa ba kusa ba.