Babban Bankin Duniya da Asusun Lamuni na Duniya (IMF) sun yi kira ga Babban Bankin Najeriya (CBN) da ya dage wajen shawo kan hauhawar farashi, wanda ya ƙaru daga kashi 33.6% a watan Nuwamba zuwa 34.8% a watan Disamba.
A yayin wani taron tattaunawa, babban manazarci a Bankin Duniya, Sameer Matta, ya ce wajibi ne CBN ta ci gaba da mai da hankali wajen daƙile wannan matsala. Ya kuma jaddada buƙatar inganta samar da kayayyaki, musamman a ɓangaren noma, da bunƙasa haɗin kai tsakanin karkara da birane, tare da sake duba manufofin haraji a wasu ɓangarori.
- CBN Ya Ce Bai Tilasta Wa Ma’aikata 1,000 Yin Ritaya Ba
- An Samu Haɓakar Tattalin Arziƙin Nijeriya A Rubu’i Na Ukun 2024 – CBN
A nasa bangaren, jakadan IMF a Nijeriya, Christian Ebeke, ya yi kira da a samu haɗin kai mai ƙarfi tsakanin manufofin tattalin arziƙi da na kuɗi don tabbatar da nasarar rage hauhawar farashi. Ya yaba wa ƙoƙarin CBN da hukumomin kuɗi na gwamnati wajen daƙile matsalar lamunin kasafin kuɗi da kuma inganta yanayin tattalin arziki.
Ebeke ya jaddada cewa matakan da aka ɗauka na cire tallafin man fetur da kuma gyare-gyaren darajar Naira suna da mahimmanci, amma dole ne a kare marasa galihu daga illolin da matakan ka iya haifarwa.
Haka zalika, Matta ya ja hankalin gwamnati kan mahimmancin ci gaba da aiwatar da shirin kariyar halin da mutane suke ciki da hanzarta bayar da tallafi ga talakawa.
Ya kuma yi gargadi cewa rashin ɗaukar matakai na gyara tattalin arziƙi zai ci gaba da haifar da asara mai yawa, inda tallafin man fetur da na musayar kuɗaɗe ke laƙume kashi biyar cikin ɗari na GDP na ƙasar. Wannan, in ji shi, babban ƙalubale ne ga cigaban tattalin arziƙin Nijeriya.
