A ranar 5 ga watan Nuwamba aka kaddamar da bikin baje kolin kayayyakin da ake shigowa da su kasar Sin, wato CIIE karo na 9. Wannan biki shi ne irinsa daya tilo da wata kasa ke yi a duniya. A ganina, CIIE ya wuce bikin baje koli. Dandali ne na samun wadata da ci gaba, da hadin gwiwa da kyautata mu’amala, ba kadai tsakanin Sin da kasashen da ke halartar bikin ba, har tsakanin su mahalarta.
Idan muka mayar da hankali kan kasashen Afrika, za mu fahimci cewa, bikin na bana ya zo a daidai lokacin da ake matukar bukatarsa. Ko me ye dalili?Idan ba a manta ba, a watan Mayun bana Sin ta kaddamar da manufar soke wa kasashen Afrika 53 da ke da huldar diplomasiyya da ita harajin fito. Hakika wannan manufa za ta taka rawa wajen bunkasa harkokin cinikayya da ma bunkasa samar da kayayyaki a kasashen Afrika.
Idan kuma aka hada wannan manufa da bikin CIIE, to za mu ga cewa, Sin ta bude kofa, ta yadda ’yan kasuwar Afrika za su kara fahimtar kasar da bukatunta da masu sayayya na kasar, tare da bayar da kafar talla kyauta ga kasashen. Babban abun sha’awa shi ne, wannan dandali bai takaita tallar ga Sinawa masu sayayya kadai ba, har ma a tsakaninsu mahalarta na kasa da kasa.
Ba kasuwar kayayyaki kadai kasar Sin ta samar wa kasashen Afrika ba, ta samar da hanyar da kasashen za su kyautata tattalin arziki da zamantakewar al’umma. Watau idan ’yan kasuwa suka samu damar fitar da kayayyaki, to hakan zai farfado da ayyukan masana’antu da samar da aikin yi, lamarin da zai daidaita al’amura da dama, tare da bunkasa tattalin arzikin kasashe. Kun ga ta hakan, kasashen sun samu damar samun ci gaba, bisa dogaro da albarkatu da karfinsu.
Hakika kasar Sin tana samar wa kasashen duniya dimbin damarmaki na samun ci gaba ba tare da nuna wariya ko kyashi ba. Kuma wadanda suka fi amfana da manufofinta na tallafi da gata su ne kasashen Afrika, lamarin da ya nuna karara cewa, burinta shi ne ganin ci gaban kasashe masu tasowa da tabbatar da adalci da daidaito da wadata da kwanciyar hankali masu dorewa a fadin duniya.
