Dakarun PLA Sun Harba Makamai Masu Rai Yayin Matakan Da Suka Kaddamar A Kusa Da Tsibirin Taiwan

Rundunar ‘yantar da al’umma ta kasar Sin ko PLA dake aiki a yankin gabashin kasar, ta gudanar da matakan soji a kusa da tsibirin Taiwan, inda ta harba wasu sabbin samfuran makaman roka masu rai zuwa sararin samaniya.

Da misalin karfe 1 na ranar jiya Alhamis ne rundunar ta gudanar da matakan, ta kuma yi nasarar sarrafa makaman rokar bisa tsarin aikin su.

• Rundunar Sojan Kasar Sin Ta Gamsu Da Sakamakon Atisayen Soja Da Ta Yi A Yankin Teku Dake Gabashin Zirin Taiwan

Da yammacin ranar kuma, rundunar sojojin dake sarrafa rokoki, ta harba nau’o’in makamai masu linzami, cikin sassan gabashin teku, daura da gabashin tsibirin na Taiwan. Dukkanin makaman sun kai ga wuraren da aka tsara harba su cikin nasara.

Babban jami’in rundunar Liu Dongkun, ya ce dakarun za su cika aikin su da jam’iyyar Kwaminis ta kasar Sin mai mulkin kasar, da kuma al’ummar Sinawa suka dora musu, na kare ikon mulkin kai da tsaron iyakokin kasar. (Saminu Alhassan)