Dan Takarar Sanatan APC A Abiya, Kelvin Ugboajah Ya Mutu

Dan takarar Mazabar Sanatan Abiya ta Tsakiya a karkashin jam’iyyar APC, Hon Kelbin Ugboajah, ya mutu.

An sanar da mutuwar tasa ce a ranar Talata ta cikin sanarwar da Ariam Usaka Oboro ya fitar a madadin iyalan a karamar hukumar Ikwuano da ke jihar.
Tun a ranar Asabar dai aka yi ta rade-radin mutuwar dan takaran bayan rashin lafiyar da ya kamu da ita.

• Jam’iyyar APC Ta Rusa Kungiyoyin Yakin Zaben ‘Yan Takara

Marigayin dan siyasar kwararren lauya ne ya taba zama kwamishinan ayyuka da filaye na jihar Abia har sau biyu a zamanin mulkin tsohon gwamna Orji Uzor Kalu.

Ugboajah tsohon Shugaban karamar hukumar Ikwuano ne, ya kuma nemi takarar dan majalisar wakilai ta tarayya mai wakiltar mazabar Ikwuano/Umuahia a karkashin APC a zaben 2019.

Kafin mutuwarsa mamba ne a Majalisar kolin asibitin Gwamnatin tarayya ta Obafemi Awolowo da ke Jihar Osun.