Ƙungiyar Ƴan Kwangila ta Jihar Kaduna ta jinjina wa Gwamna Uba Sani kan ƙaddamar da tsarin biyan kuɗaɗe a kowane wata domin biyan basussukan da aka tantance waɗanda gwamnatinsa ta gada daga gwamnatin da ta gabata.
Shugaban ƙungiyar, Injiniya Ahmed Baba, ne ya bayyana hakan bayan kammala wata ganawa tsakanin manyan jami’an gwamnatin jihar da shugabannin ƙungiyar a Kaduna. Ya bayyana cewa duk da ɗimbin basussukan da Gwamna Uba Sani ya gada, ya nuna cewa shugabanci aiki ne mai ci gaba ta hanyar ɗaukar matakin biyan ƴan kwangilar haƙƙoƙinsu.
A cewar Injiniya Baba, tsarin biyan kuɗaɗen a kowane wata zai tabbatar da an biya dukkan basussukan da aka tantance a tsanake, wanda hakan zai sauƙaƙa wa ƴan kwangilar da suka gudanar da ayyuka a jihar nauyin da ke wuyansu.
Shugaban ya ƙara da cewa ƙungiyar na matuƙar godiya ga ƙoƙarin gwamnan, inda ta sha alwashin ba da cikakken goyon baya ga shirye-shiryen gwamnatin na raya ababen more rayuwa a faɗin Jihar Kaduna.
Injiniya Ahmed Baba ya buƙaci dukkan ƴan kwangilar da ke aiki a jihar da su tabbatar da yin ayyuka masu inganci tare da kammala su a kan lokaci, a matsayin martani mai kyau ga wannan karamci da gwamnan ya nuna musu.
