Gwamnatin Katsina Ta Fitar Da Naira Miliyan Dubu 50 Domin Samar Da Ruwan Sha 

Gwamnatin Jihar Katsina ta fitar da naira miliyan dubu 50 domin gudanar da ayyukan samar da ruwan sha a kanan hukumomi 20 da ke cikin jihar.

Shugaban hukumar samar da ruwan sha na Jihar Katsina, Dakta Tukur Hassan Tingilin ya bayyana haka a lokacin kaddamar da kwamitin karbar korafe-korafe na shirin SURWASH a jihar.

• An Samu Ci Gaba A Bangaren Kayayyakin Da Sin Ta Fitar Zuwa Kasashe Da Yankuna 160 A 2024
• Kotu Ta Bayar Da Belin Sowore Kan Naira Miliyan 10

Ya bayyana cewa naira miliyan dubu 50 da aka ware na cikin kasafin kudin wannan shekarar da aka yi.

Dakta Tingilin ya ce kudaden za su bai wa gwamnatin jihar damar samar da tsabatataccen ruwan sha ga mazauna yankunan birane da karkara da ke kananan hukumomi 20 a jihar.

Ya jaddada cewa gwamnatin jihar ta kashe naira miliyan dubu 20 kan ayyukan samar da ruwan sha da tsaftar muhalli a kananan hukumomi 10 na cikin jihar a shekarar da ta gabata.

Dakta Tingilin ya ce a cikin wannan shekarar, gwamnatin Jihar Katsina ta yi kasafin kudi na naira miliyan dubu 50 domin tabbatar da samar da tsabtataccen ruwan sha a kananan hukumomi 20 na cikin jihar.

Ya kara da cewa kwamitin karbar korafe-korafe da aka kafa, an kafa shi ne domin duba aikace-aikacen shirin SURWASH da ake gudanarwa ga al’ummar a jihar.