Hukumar kiyaye haddura ta kasa (FRSC) ta bayyana cewa mutane 9 ne aka tabbatar da mutuwarsu yayin da wasu 10 suka samu raunuka a wani hadarin mota da ya rutsa da su a hanyar Yangoji zuwa Abaji a babban birnin tarayya, Abuja.
A cewar wata sanarwa dauke da sa hannun jami’in kula da ilimantar da jama’a na FRSC, Bisi Kazeem, yace, hadarin ya rutsa ne da wata mota kirar Toyota Hiace Bus mai lamba KTG-450 KQ da kuma motar Howo Sino a kan hanyar Yangoji zuwa Abaji da misalin karfe 06:05 na safiyar ranar Asabar.
Ya ce motar bas din ta fito ne daga jihar Osun ta nufi jihar Katsina amma kaddara faru inda motar ta afka wa wata tirela da ke tsaye.
Duka motocin da hadarin ya rutsa da su, motocin kasuwanci ne.
Kazeem ya ce, “Mutane 22 ne Hadarin ya rutsa dasu. Dukkansu mazaje ne, Mutum 10 sun samu raunuka yayin da tara suka rasu.
“An ajiye gawarwakin mutane tara a babban asibiti na Kwali a bangaren ajiye gawarwaki amma rundunar ‘yan sandan Nijeriya reshen Kwali ta dauki nauyin gudanar da binciken lamarin.”
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
