Hadin guiwar jami’an tsaron ‘yan sanda da sojoji sun kashe wasu mahara guda biyu a yankin Okija, da ke karamar hukumar Ihiala a jihar Anambra.
An samu labarin wasu maharan sun tare mahadar hanyar Okija a ranar Asabar, inda suka dinga harbe-harbe suna yi wa fasinjoji fashi a kan babbar hanyar Onitsha zuwa Owerri.
- Wata Mata Ta Kashe Mijinta Da Wuka Har Lahira A Adamawa
- Fasinjojin Jirgin Kasan Abuja-Kaduna Sun Roki Manyan Kasashen Duniya Su Kawo Musu Dauki
Sai jami’an tsaro sun tare su inda suka musu kwanton bauna, suka yi dauki ba dadi da su.
Kakakin ‘yan sandan jihar Anambra, DSP Tochukwu Ikenga, ya tabbatar da hakan ga manema labarai a garin Awka babban birnin jihar a yau Lahadi.
Ya ce an samu nasarar kwato wasu manyan bindigu guda gudu, sai motoci guda hudu da kuma baburan hawa guda hudu.
Ya ce tuni aka mika su zuwa babban sashen binciken manyan laifuka na hedikwatar ‘yan sandan da ke Awka a jihar, don zurfafa bincike a kan su.
