Jam’iyyar APC a Jihar Katsina ta karbi manyan jiga-jigan PDP 7 da kuma magoya bayansu sama da dubu 10,000 da suka sauya sheka.
Mafi yawan wadanda suka sauya shekar sun kasance na kusa da tsohon gwamnan Jihar Katsina, Barista Ibrahim Shehu Shema.
- An Fitar Da Tsarin Yin Kwaskwarima Na JKS Da Hukumomin Gwamnati
- Buhari Ya Bukaci A Gaggauta Kama Maharan Zangon Kataf
Darakta Janar na gangamin yakin neman zaben jam’iyar APC a Katsina, Akitek Ahmed Musa Dangiwa ya bayyana haka ga manema labarai, yana mai cewa Gwamna Aminu Bello Masari ya karbi wadanda suka sauya shekar.
Daga cikin wadanda suka sauya shekar akwai, Alhaji Bishir Tanimu Dutsinma fitaccen mai aikin jinkai da Alhaji Idi Kwado da Alhaji Ibrahim Lawal Dankaba tsohon kwamishinan ruwa da Jamilu Mamman Danmusa da Alhaji Abdulwahab Sani Store da Hajiya Aisha Isa Kaita da sauransu.
Dangiwa wanda ya bayyana godiya ga wadanda suka sauya shekar a kan dawowa jam’iyar APC, ya yi fatan cewa jam’iyyar za ta samu nasara a zaben gwamna da za a gudanar ranar Asabar.
Sai dai ya ja hankalin hukumomin tsaro da hukumar zabe a jihar cewa su kasance a ankare kasancewar ana zargi jam’iyyar PDP na shirin kawo ‘yan bangar siyasa daga jihohin Kano da Zamfara domin lalata zaben gwamna da na ‘yan majalisun jihohi a jihar.
