Kotun Ƙoli Ta Tabbatar Da Muhammadu Iliyasu Bashir A Matsayin Sarkin Gwandu

Kotun Ƙoli ta yanke hukunci a kan shari’ar da aka daɗe ana yi tsakanin Sarkin Gwandu na yanzu, Muhammadu Iliyasu Bashir, da tsohon Sarki, Al-Mustapha Haruna Jakolo.

A hukuncin da kotun ta yanke, ta soke hukuncin kotun Jihar Kebbi da kotun ɗaukaka ƙara da ke Sakkwato, waɗanda suka umarci a mayar da Jakolo a matsayin Sarkin Gwandu watanni shida da suka wuce.

• Zaman Lafiya A Duniya: Mu Baje Sin Da Amurka A Faifai
• ‘Yansanda Sun Kama ‘Yan Ƙungiyar Asiri 4, Sun Ƙwato Makamai A Filato

Kotun Ƙoli ta karɓi ƙarar da Sarkin Gwandu mai ci da gwamnatin Jihar Kebbi suka ɗaukaka, inda ta bayyana cewa Muhammadu Iliyasu Bashir shi ne sahihin Sarkin Gwandu.

Alƙalai biyar ne suka saurari shari’ar, inda uku daga cikinsu suka yarda da hujjojin da lauyoyin Sarkin Gwandu da gwamnatin jihar suka gabatar.

Sai dai sauran alƙalai biyu sun goyi bayan hujjojin da lauyan Jakolo ya gabatar, amma alƙalai ukun sun rinjaye su.

Wannan rikici na kujerar mulki ya ɗauki kusan shekaru 20 ana kai ruwa rana a kotu.

Yanzu dai hukuncin kotun ƙoli ya kawo ƙarshen shari’ar, inda ta tabbatar da Muhammadu Iliyasu Bashir a matsayin Sarkin Gwandu na Ashirin.