Kungiyar gamayyar gidajen rediyo da talabijin na kasashen Afirka (URTNA) ta gudanar da bikin ba da kyautukan karramawa ga kafofin yada labarun kasashe daban daban, a Abidjan na kasar Kodibuwa, a jiya Juma’a, inda shirin musamman da babban gidan rediyo da talabijin na kasar Sin CMG ya tsara, game da kaurar da dabbobi suka saba yi a gabashin Afirka, ya samu lambar yabo a fannin cudanyar al’adu da kirkiro sabbin fasahohi.
Kungiyar URTNA ta gudanar da taronta na shekara-shekara karo na 16 ne a birnin Abidjan, tsakanin ranekun 19 da 20 ga watan da muke ciki, inda bikin mika kyautukan yabon ya kasance wani muhimmin biki da ya gudana a karshen wa’adin taron. Kana a wajen bikin, ministan harkar watsa labarai na kasar Kodibuwa Amadou Coulibaly, a madadin URTNA, ya mika kyautar yabo ga wata wakiliyar kamfanin CMG.
Kafin haka, yayin da William Ruto, shugaban kasar Kenya, ke ziyara a kasar Sin a watan Afrilun bana, shi ma ya yabi CMG bisa gudunmowar da ya bayar ta fuskar karfafa cudanyar al’adu tsakanin kasarsa ta Kenya da kasar ta Sin.
A cewar shugaba Ruto, shirin talabijin da CMG ya tsara dangane da kaurar dabbobi a gabashin Afirka ya nuna muhallin halittu mai kyan gani na Afirka, wanda ya taimaka wajen janyo hankalin ‘yan yawon shakatawa na kasashe daban daban zuwa ga kasar Kenya. (Bello Wang)
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
