Yayin da babban zaɓen 2027 ke ƙara gabatowa, ƙaruwar hare-haren siyasa, da kalaman ƙiyayya, da barazana na ci gaba da jefa fargaba game da lafiyar ƴan siyasa, da mambobin jam’iyyu, da masu kaɗa ƙuri’a a faɗin Nijeriya.
Rahotanni sun tabbatar da ɓarkewar rikici tsakanin ƙungiyar ‘Tinubu Must Come’ mai goyon bayan tazarce ga Shugaba Bola Ahmed Tinubu da kuma ƙungiyar masu adawa ta ‘Tinubu Must Go’ a lokacin wani taron gangami a yankin Jimeta da ke Yola, Jihar Adamawa.
Jam’iyyun adawa daban-daban, ciki har da ADC, PDP, LP, da NDC, sun yi tir da yawaitar hare-hare a kan tarurrukansu, da ofisoshi, da magoya bayansu a jihohi da dama da suka haɗa da Legas, da Enugu, da Edo, da Ribas, da Kogi, da Kuros Riba, da Osun, da Ebonyi, da kuma Birnin Tarayya Abuja.
Daga cikin munanan lamuran da aka ruwaito, akwai kisan wani mamban jam’iyyar ADC mai suna Kamadiyoi a Ƙaramar Hukumar Abua/Odual ta Jihar Ribas yayin da yake shirin halartar wani taro siyasa, gami da harin da ƴan daba suka kai kan sakatariyar Jam’iyyar Labour a Idimu ta Jihar Legas inda aka ji wa mutane da dama raunuka tare da lalata kayan aiki.
Baya ga tashin hankali a zahiri, kalaman tunzura jama’a da barazana daga bakin wasu jiga-jigan gwamnati da ƴan siyasa na ƙara ruruta wutar rikici. A Jihar Edo, an zargi wani shugaban ƙaramar hukuma da yin barazanar rushe otal-otal ɗin da suka karɓi baƙuncin taron jam’iyyun adawa, yayin da a Kuje da ke Abuja aka zargi wani shugaba da kiran waɗanda ba za su zaɓi APC ba da su fice daga yankin. Ministan Babban Birnin Tarayya, Nyesom Wike, shi ma ya gargaɗi tsohon gwamna Rotimi Amaechi cewa ba zai sami damar yin yaƙin neman zaɓe a Ribas cikin sauƙi ba muddin ya ci gaba da kiran magoya bayan Tinubu ɓarayi.
Da yake mayar da martani kan wannan yanayi, Shugaban Hukumar Zaɓe Mai Zaman Kanta ta Ƙasa (INEC), Farfesa Joash Amupitan (SAN), ya gargaɗi ƴan siyasa yana mai jaddada cewa babu wata kujerar siyasa da gaske da ikon ta zubar da jinin kowane ɗan Nijeriya.
Amupitan ya bayyana cewa hukumar ta ƙaddamar da tsarin gargaɗin farko kan rikice-rikice (early-warning system) ta hanyar Kwamitin Haɗin Gwiwa kan Tsaron Zaɓe (ICCES) domin bibiyar ƴan daba da kalaman ƙiyayya. Haka kuma, masana tattalin arziƙi sun gargaɗi cewa wannan rikici na iya korar masu zuba jari daga ƙasashen waje tare da zubar da mutuncin Nijeriya a idon duniya idan ba a ɗauki matakin daƙile shi a kan kari ba.
