Wani mamban Kwamitin Yaƙin Neman Zaɓen Shugaban Ƙasa na Jam’iyyar APC (APC-PCC), Musa Iliyasu Kwankwaso, ya bayyana cewa shiyyar Arewa maso Yamma ta rungumi aniyar tabbatar da sake zaɓen Shugaba Bola Ahmed Tinubu a karo na biyu a 2027, yana mai kafa hujja da ɗimbin dandazon jama’a da suka halarci taron gangamin buɗe yaƙin neman zaɓen shugaban ƙasa na jam’iyyar a Kaduna a yau Asabar, 24 ga watan Oktoba, 2026.
Da yake zantawa da manema labarai a sashin manyan baƙi yayin da taron ke gudana, Iliyasu Kwankwaso ya bayyana cewa wannan gagarumar fitowar da al’umma ta share dukkan shakku game da matsayar siyasa ta shiyyar Arewa maso Yamma gabanin babban zaɓen 2027. Ya ce zaɓin da yankin ya yi na marawa Tinubu baya ya samo asali ne daga aniyar tabbatar da haɗin kan ƙasa da gina Nijeriya mai ɗa’a da ci gaba, yana mai jaddada cewa komawar Tinubu kan karagar mulki za ta bayar da damar tabbatar da adalci wajen raba arziƙi da ayyukan raya ƙasa a tsakanin shiyyoyin ƙasar nan guda shida.
Dokta Kwankwaso ya kuma yi watsi da zargin cewa goyon bayan da Arewa ke bai wa shugaban ƙasar wata siyasa ce kawai ta ciniki ko biyan buƙatar kai ta lokaci kaɗan.
Ya jaddada cewa yankin a shirye yake ya cika alƙawuransa na siyasa, yana mai bayyana cewa: “Asiwaju ɗan takarar Arewa ne… mu mutane ne masu cika alƙawari da amana, kuma za mu tabbatar da nasararsa a zaɓen 2027.” A ƙarshe, ya yi kira ga masu ruwa da tsaki a harkar siyasa a faɗin ƙasar da su ajiye ƙananan buƙatun siyasa a gefe domin ba da fifiko ga haɗin kai da ci gaban ƙasa baki ɗaya.
