Majalisar Dattawan Nijeriya ta buƙaci a gaggauta ƙarfafa matakan tsaro a yankunan da ke kan iyakokin jihohin Taraba, Filato da Bauchi, bayan rahotannin kashe mutane kusan 80 da ’yan bindiga suka yi a garin Binnari, Jihar Taraba.
Majalisar ta buƙaci jami’an tsaro su kafa ƙarin sansanonin tsaro tare da ƙara sa ido domin hana sake kai hare-hare da kare rayukan al’umma.
Matakin ya biyo bayan ƙudirin gaggawa da Sanata Isa Shuaibu Lau ya gabatar a zaman majalisar ranar Laraba.
Ya ce hare-haren da ake yawan kai wa ƙauyuka sun jawo asarar rayuka, tsoro da tilasta wa mutane barin gidajensu.
Majalisar ta kuma buƙaci Hukumar Ba da Agajin Gaggawa ta Ƙasa (NEMA) da Hukumar Raya Arewa maso Gabas su gaggauta kai kayan agaji ga al’ummomin da abin ya shafa.
’Yan majalisar sun kuma yi shiru na minti ɗaya domin girmama waɗanda suka rasu.
An kai harin ne ranar Juma’a, 23 ga Oktoba, lokacin da ’yan bindiga suka mamaye garin Binnari bayan sallar Juma’a.
Rahotanni sun ce sun riƙa harbe-harbe, kwashe kayayyaki daga shaguna, tare da ƙona wasu shaguna da babura.
Yayin da Majalisar Dattawa ta ambaci mutuwar mutane kusan 80, wasu rahotannin al’umma sun ce adadin waɗanda suka mutu ya kai 50.
Ana zargin maharan sun shigo Taraba ne daga maƙwabciyar Jihar Filato.
Majalisar ta buƙaci jami’an tsaro su ɗauki matakan gaggawa domin dakatar da ƙarin kashe-kashe da dawo da zaman lafiya a yankunan da abin ya shafa.
