Matatar man fetur ta Dangote ta ƙara farashin fetur zuwa ₦1,275 kan kowanne lita, yayin da dizal ya tashi zuwa ₦1,950, lamarin da ake ganin zai haifar da ƙarin tsadar mai a gidajen mai a faɗin ƙasar.
Wani babban jami’i a matatar ya tabbatar da hakan, yana mai cewa sabon tsarin farashin ya samo asali ne daga hauhawar farashin ɗanyen mai a kasuwar duniya da kuma yanayin kasuwa gabaɗaya.
- Dangote Da GCL Sun Ƙulla Yarjejeniyar Gina Masana’antar Taki A Habasha
- Rikicin Gabas Ta Tsakiya Na Iya Sa A Koma Aiki Daga Gida – Dangote
A sabon tsarin, farashin fetur ya ƙaru da ₦75 daga ₦1,200 zuwa ₦1,275 (ƙarin kashi 5.02%), yayin da dizal ya yi tsalle da ₦200 daga ₦1,750 zuwa ₦1,950, abin da ya kusantar da shi zuwa ₦2,000 kan kowanne lita a gidajen mai.
Ana sa ran wannan ƙarin zai ƙara tsadar sufuri, da jigilar kaya da kuma harkokin samar da kayayyaki, musamman ga ’yan kasuwa da ke fuskantar ƙalubalen tattalin arziƙi a halin yanzu.
Jami’in ya danganta ƙarin farashin da rashin daidaiton kasuwar mai ta duniya, musamman tasirin rikice-rikicen Gabas ta Tsakiya kan farashin ɗanyen mai, yana mai cewa duk da ƙaruwa a tace mai a cikin gida, farashin har yanzu yana bin tsarin kasuwar duniya.
Discussion about this post